Nakatakdang Ilunsad ng GCC ang Unified Tourist Visa Bago Matapos ang Taon

Patuloy pa rin ang pagsulong ng proyekto para sa unified Gulf tourist visa habang kinumpirma ng mga opisyales mula sa Gulf Cooperation Council na tuloy-tuloy ang pag-unlad ng mga teknikal na paghahanda.

Sa isang pinagsamang panayam ng medya matapos ang ika-164 na pulong ng Konseho ng mga Ministro sa Kuwait, ipinahayag ni Jassim Al-Budaiwi, Kalihim-Heneral ng GCC, ang kanyang pagkakaroon ng positibong pananaw hinggil sa itinakdang iskedyul para sa pagpapatupad ng visa.

Ayon sa kanya, layunin pa ring matapos at maaprubahan ang sistema bago matapos ang 2025.

Isinagawa ang anunsyo matapos ang mga naging diskusyon na pinangunahan ng Ministrong Panlabas ng Kuwaiti na si Abdullah Al-Yahya, na siyang namuno sa sesyon ng konseho.

Nagsama-sama sa pulong ang mga pangunahing opisyales upang talakayin ang mga usaping pampulitika at pang-ekonomiya, at mas pinagtuonan nila nang husto ang mga estratehiya para sa mas malalim na rehiyonal na kooperasyon. Inilarawan ni Al-Yahya ang pagpupulong bilang produktibo at sumasalamin sa kanilang sama-samang paninindigan para sa mga inisyatibong pang-Gulf.

Layunin ng unified visa na gawing mas simple ang paglalakbay sa mga bansang kabilang ng GCC sa pamamagitan ng isang dokumento lamang para sa pagpasok. Inaasahan na sa pamamagitan ng sistemang ito, lalakas ang turismo at aangat ang negosyo sa rehiyon dahil sa mas maginhawang pagtawid sa mga hangganan nito.

Bagama’t tinalakay rin sa pulong ang mas malawak na usaping pampulitika at pangteritoryo, kabilang na ang mga hangganang pandagat at ugnayang panrehiyon, namukod-tangi ang proyekto ng unified visa bilang isang mahalagang hakbang sa pagsusulong ng makabuluhang inisyatibo sa Gulf. Kinumpirma ng mga opisyales na malapit nang matapos ang mga teknikal na sistema at nananatiling nakaayon ang mga paghahanda sa itinakdang iskedyul.

Magsisilbing bagong kabanata ang visa sa rehiyonal na mobilidad sa pagitan ng mga kabilang na estado ng GCC at bahagi ito ng mas malawak na pagsisikap na palakasin ang integrasyon sa larangan ng ekonomiya at lipunan.